সপোন নে দিঠক
- পলী মজুমদাৰ
- Sep 15, 2025
- 1 min read
Updated: Sep 16, 2025
জোনটো নামি আহিছিল
নৈখনৰ বুকুত গা ধুবলৈ ,
চুচুক চামাককৈ
মইও আগবাঢ়ি গৈছিলোঁ--
জোনটোৰ সৈতে
কথা পাতো বুলি -- ।
ক'ৰ পৰানো আহিল
এচমকা কলা ডাৱৰ -
জোনটো গিলি থলে ,
বালিচৰটোৰ গাত তেতিয়াও
লাগি আছিল
জোনাকৰ কণাবোৰ ।
মই যেতিয়া
কঁহুৱা ডৰাৰ আঁৰত
জোনাকৰ গানটো
গুণ গুনাই আছিলোঁ --
তেতিয়া নৈখনৰ হাঁহিৰ খলকনি শুনি
মূৰ দাঙি চাইছিলোঁ--
জোনটোৱে ঢৌবোৰৰ সৈতে
লুকাভাকু খেলি আছিল,
নৈখন আৰু জোনটোৱে
বালিচৰটোত সাজিছিল
এটি ৰূপালী বালি ঘৰ..।।
সপোন নে দিঠক আছিল জানো
ধৰিবই নোৱাৰিলোঁ।
পলী মজুমদাৰ
মৰিগাঁও
8638871060
Comments