ব্ৰেণ্ডেড হেঁপাহ

শ্ব'ৰুমৰ আয়নাৰ মাজত

ব্ৰেণ্ডেড সপোন

লানি লানি,

বৰ হেঁপাহ হয়

ব্ৰেণ্ডেড সপোনেৰে মেৰিয়াব

মোৰ সস্তীয়া দুভৰি |

অপদাৰ্থ মানিবেগটো খুচৰো,

লাগি আহে আঙুলিত

শোতোৰা কেইটামান নাম

দৰদাম কৰো

ব্ৰেণ্ডেড সপোনৰ

বসুধৈৱ কুটুম্বকম্ |

তুলাচনীৰ এফালে সপোন বহে

আটোম টোকাৰীকৈ

আনফালে বিৱৰ্ণ নাম

নামবোৰ পাতল হয় ক্ৰমশঃ

আৰু ওপঙি ফুৰে

চৰাইৰ পাখিৰ দৰে |

বুকুত সাৱটো ব্ৰেণ্ডেড হেঁপাহ

বুঢ়া ডাষ্টবিনটো বহি থাকে হামিয়াই

সমাধিস্থ কৰি আহো তাত

উৱলি যোৱা নামবোৰ ।

নীলম শৰ্মা