বিনিময়

মৰম পালে

হৃদয় বীণাত ঝংকাৰিত হয়

প্রাপ্তিৰ মহানন্দ

বিনিময়ত যাচোঁ

এমোকোৰা নিভাঁজ হাঁহি

আৰু আলফুলীয়া চেনেহ-সনা পৰশ।

মই বোলে দুষ্ট,

পিছে দুষ্টৰ লগতহে !

মনত দুখ দিলে

প্রতিশোধ লওঁ -

হয় কন্দা -কটা কৰি ,

নহয় উপেক্ষা বা অৱজ্ঞা কৰি।

প্রশংসা কৰিলে

দেখুৱাওঁ দুগুণ উৎসাহ,

অন্যথা

মই শিলৰ খুঁটি

চেষ্টাক কৰোঁ

বৃথা নিষ্ফল ।

আমাৰো এটা মন আছে

আছে আকাশচুম্বী হেঁপাহ

আমি একোটি সদ্য অংকুৰিত বীজ মাথোঁ।

মৰমেৰে আপডাল কৰিলে

উপযুক্ত পৰিৱেশ পালে

আমিও জকমকাই ফুলি

সুৱাস বিলাব পাৰোঁ

মন- মগজুৰ ডালে ডালে

সুমধুৰ ফল হৈ যোগাব পাৰোঁ

জ্ঞানপিপাসুৰ জ্ঞানসুধা

আৰু

অজলা-নিচলাৰ অন্নক্ষুধা।

মনোজ কুমাৰ শৰ্মা (অভিযন্তা)

নগাঁও, অসম

দূৰভাষ নং ৯৪৩৫১ ৬০৫৩২