চকুৰ কোণত অশ্ৰু কঢ়িয়াই ফুৰা মানুহজনী---

গোলাপী ৰঙৰ সলনি চকুৰ তলত

ক'লা দাগ পৰা মানুহজনী

তুমি পোৱানে চিনি ?

এদিন তৰাফুলৰ মালা গাঁঠি

বুকুত সুখৰ ৰামধেনু অঁকা

ফুটুকী পখিলাজনী,

যিয়ে তোমাক

প্ৰেমিকৰূপে কৰিছিল বৰণ,

আদ বয়সতে কপালত

বলিৰেখা পৰা উজ্বল মুখৰ ধেনুভিৰীয়া চেলাউৰিৰ

হাঁহিমুখীয়া মানুহজনী,

দুৰ্বল দুখন ভৰিৰ ওপৰত

দুখ-যন্ত্ৰণাৰ অসহ্যকৰ ভৰ কঢ়িয়াই চকুৰ পতাত অব্যক্ত বেদনা সামৰি

মিচিকি হাঁহিৰে আমাৰ জীৱনক

সজীৱ আৰু অৰ্থবহ কৰি তোলা

সেই মানুহগৰাকী,

সেইগৰাকী মোৰ মা-----

পিতাই তোমাৰ অসুখত নিজৰ

নিদ্ৰা, ভাগৰ আৰু জঠৰতা পাহৰি

চকুত অশ্ৰু কঢ়িয়াই

সুস্বাদু আহাৰ সজাই

তোমাক পৰিচৰ্যা কৰি আনন্দ পোৱা

সেইগৰাকী তোমাৰ আদৰ্শ পত্নী---

ফুলশয্যাৰ ৰাতি তোমাৰ দুভৰি

নিজৰ চুলিৰে মচি

নাৰীত্বৰ গোপনীয়তা উচৰ্গা কৰা

সেইগৰাকী তোমাৰ জীৱন লগৰী---

আৰু দুদিন পাছতেই

অপবাদ, লাঞ্চনাৰ তেজৰঙা

প্ৰাচীৰ সাজি এলাগী সজোৱা,

সুবিধা পালেই আত্মসন্মানক আঘাত কৰি মিনিটতে মাকৰ ঘৰলৈ উভতি যাবলৈ কোৱা সেই মানুহজনী তোমাৰ

এসময়ৰ প্ৰেয়সী----

পতিৰ তিৰস্কাৰ সহ্য কৰি

প্ৰকৃত ঠিকনাৰ অভাৱত

নিজ মাতৃৰ ঘৰলৈ যাব নোখোজা,

ভাই-ককাইৰ কটাক্ষ শুনিবলৈ

ভয় কৰি সন্তানক বুকুত সাৱটি

পদপথত ভিক্ষাৰীৰ ভাও ধৰা

হতভগীয়া যাযাবৰী মানুহগৰাকী

জানা --------

সেয়া মোৰ মা, মোৰ মা----!!!!!

ড° নাজমা বেগম

নগাঁও  অসম।

দূৰভাষ নং--৯৪৩৫৮৪১৭২৭