পূজাৰ বতৰ

আহিন আহিলেই পূজা পূজা লাগে ,

বজাৰত বস্তুৰ জুই চাই দাম ,

পূজা আজি গৰীবৰ চকুলো

ধনীৰ ভোগৰ উৎসৱ।

আহিন আহিলেই পূজা পূজা লাগে ,

শুকুলা আকাশ ,ফৰকাল বতৰ

চোতালৰ দূৱৰিত নিয়ৰৰ পৰশ

শেৱালিৰ সুবাসে বিলাই ফুৰে

পূজাৰেই বাতৰি ।

আহিন আহিলেই পূজা পূজা লাগে

ক'ৰবাত ঢাক বজোৱাৰ ৰিণি ৰিণি শব্দ ,

পূজা আহিছে ।

মনত পৰেনে জেলেপী খোৱাৰ কথা ?

চিকেন বিৰিয়ানীয়ে পাৰিব জানো

ম্লান কৰিব পূজাৰ জেলেপীৰ স্বাদ?

মনত পৰেনে হাতত জুনুকা লৈ

পিতাইৰ স'তে চাইকেলত উঠি

পূজা চাবলৈ যোৱাৰ কথা ?

মনত পৰেনে পূজাৰীৰ হাতৰ পৰশেৰে

কপালত দিয়া ডাঙৰ ডাঙৰ ফুট কেইটাৰ কথা ?

এতিয়া সময় সলনি হ'ল ,

বেলুন ,জুনুকাবোৰ কেতিয়া যে হেৰাই থাকিল !

এতিয়া ইয়াত

কণমানি হঁতৰ হাতে হাতে

নকল পিষ্টল ,এ, কে ৪৭ বন্দুকৰ

শব্দৰ ধ্বনি প্ৰতিধ্বনি হৈ

মুখৰিত হয় পূজাৰ থলী,

পূজাৰীৰ মন্ত্ৰ পাঠ এক অস্পষ্ট শব্দ ,

পূজাৰ প্ৰতিমাও হৈ পৰিছে

এক প্ৰতিযোগিতাৰ সামগ্ৰী ।

পূজা মানূই খোৱা-পিন্ধা ,

উন্মাদ তাণ্ডব নৃত্য,

পূজাৰ বেদীৰ কাষত

মাতাল যুৱকৰ টেটুফলা চিয়ঁৰ -

জয় দুৰ্গা মাইকী জয়।

ক'ত বাৰু হেৰাই থাকিল ?

দেবীমাৰ ভক্তি আৰু বিশ্বাস ?

পূজা আজি এক ভোগবাদী উৎসৱ !

এতিয়া ইয়াত সহিষাসুৰেই উঠিৰজা বহিৰজা !

দেবীমাৰো কি যে গান্ধাৰীৰ ৰূপ !

উপায়ন্তৰ দেবী ভোগবাদী হাতুৰাত

দেবী আজি নজৰ বন্দী !

আহিনৰ মৰা আউসী নাশিবলৈ

কোন দিনা আহিব শাৰদী জোনাক !

ক'ৰবাত পূজাৰ বেদীত

ৰিণি ৰিণি শুনিছোঁ

গৰীৱ -নিচলাৰ

অৰ্চনা ,দেবী বন্দনা

"যা দেবী সৰ্বভূতেষু

.............................

.............................

নমস্তস্যৈ নমস্তস্যৈ নমস্তস্যৈ

নমো নমঃ।"

ডাঃ ঋষেশ্বৰ ঠেঙাল শইকীয়া

নগাঁও, অসম।

দূৰভাষ নং, ৮৮৭৬৬ ৮২৪৮০